ومشلوعة عيني ..




مقصرة ومشلوعة عيني ..

بس أدري انكم بتسامحوني على التقصير

بكرا السفر .. بكرا

شهرين في ديار "الفرنجة" مع طفلتين مخلوطتي الأعراق معجونتين بالشطانة الأبدية

لما الحين ما حطيت ولا عود بجنطة سفر، ولا صليت صلاة الإستسقاء ولا قريت صورة يس ولا تشهدت على روحي الشهادتين ..

"غدونة" تقول انها ما تبيني اقعد يمها بالطيارة لإنها بتلون .. ما ادري يمكن اقطع حبل ألوانها !!

وبتحذف " هنا" من الويندو اذا خذت اغراضها !!

طبعا ماله داعي أفسر وأقول ان "خضرة" ما يحلى لها إلا الشي إللي في إيد " نورية"!

وقعدي بالوسط بس فاككي وراضي ومسحي دموع اربع اربع ..


عاد اليوم بروح في Mission impossibe الى سوق بو إمية

ما راح أخلي ألوان، طين، لعبة، تركيب، مسجلة، مكنسة، منظرة، دمية، شباصة، عضاضة، ستكرز .. إلا وشريتها !!

ولو أكو ماريجوانا او بانجو ترى باخذ وكيفكم قولوا إللي تقولونه !!

وحدة من الشايتين .. يا ذابحه يا مذبوحة، يا قاطّه يا مقطوطة، يا شايحة يا مشيوحة، يا دافنة يا مدفونة !!


أدري ان ما راح يهوّن علي مصيبتي (( الحمد الله على كل حال طبعا .. وألف من ذتشره )) إلا دعاؤكم لي في عز الليل

طلعا اليوم المشهود راح يمشي عندكم عادي وطبيعي ولا كأنه في وحده وفريخاتها معلقة بالسما 16 ساعة

ارجوكم وهذ وصيتي لكم سواء وصلت "شيكا بيكا" براس فيه شعر او منتوف ..

لا تنسوني بالدعاء ..

بس دعاد واحد موحد بصلاة العشاء غدا ..

(( يا رب تهون عليها، وتسهل دربها، وتسخر لها خضرة ونورية والأمريكي والمضيفات، والركاب، والكابتن ومساعده ))

يمكن تحن علي القلوب وتكون معاي السوبر ناني راجعة لأهلها .. يا رب بمرة ملك يسمع مناجاة أم Freaking out


عاد إذا وصلت بالسلامة ولما الحيني بكامل قواي العقلية راح اكمل " نتلاشى للأمام" عاد ما ادري اذا كان بيصير عندي وقت هناك لأعود شهرزادا خصوصا ان ما عندي خدم وحشم ونانيز ومانيز!!


اذا ما صار ..


لما اعود للكويت " حبيبة القلب" راح استأنف الشهرزادية لا محاله


طايرين على القطرية

غدا الساعة الرابعة وخمس واربعين دقيقة فجرن ن ن ن ن ن ن ن ن ن



أحبكم كلكم .. واستودعكم الله الذي لا تضيع ودائعه ..


Sara Al Mukaimy .. Over & Out


ملاحظة : أحد القراء الشاطرين الحلوين العزيزن على قلبي وايد يترجم الملحمة إللي فوق للقراء في الديار العربية حيث يعتبون علي بعض الأحيان لغلاجة الكلمات وصعوبة المطلحات ..
الترجمة في التعليق وإللي يترجم لابد له صوغة من الشيكا بيكا

تعليقات

‏قال ARTFUL
مسامحينج

وعسى الله يسمح دربج

درب السلامه

موفقين ولا تكتبين هناك قعدي واستانسي وغيري جو واستمتعي بشطانة بناتج

لاحقه على الكتابه

موفقين

والله يحفظكم ويسلمكم في حلكم وترحالكم
‏قال غير معرف…
تروحين وتردين بالسلامه إن شالله
قطعه وحده ومخ واحد كامل
لا ذابحه ولا مذبوحه,لا دافنه ولا مدفونه
ويسخرلج الركاب وكل الكرو
وسوري
دعيت الحين وما أوعدج أتذكر باجر
بالسلامه إن شالله كسرتي خاطري والله يعدي مغامرتج وتجربتج بيسر وسهوله وسلاسة أيضا
‏قال chandal/danchal!!
تروحون وتردون بالسلامة
حاسة بشعورج... احسن شي فاليوم جماعي
سهالة ان شاالله

اللي بيترجم لج خل يترجملي والهدية عليج

حتوحشينا وعيدج مبارك مقدما
:)
‏قال Towtor
الله يباركلك فيهم وتروحوا وترجعوا بألف سلامه باذن الله وماتنسى شهرزاد.
‏قال الزين
لوووووووووووول



عسى ربي يسمح دربج ويحفظج انتي والأمريكي وفريخاتكم

:**

طمنيني على اخباركم من توصلين
‏قال سبمبوت
آرتفل

والله انك حبيب .. عاد انت العادة إللي تتشره بس بينت الحين انك رجل جدا متفهم. مشكور وايد على الدعوة الحلوة ولا تخاف متسلحة بالإيمان والصبر ورشات من بهار التفاؤل.
اراكم ان شاء الله عن قريب
‏قال سبمبوت
تحلطم دوت كوم

بس الدعوة الحارة الطازجة إللي تطلع من اليوف بحزة الحزة ترى تسوي عمايل .. خلاص كافي بنام اليوم وانا متطمنة :)
‏قال سبمبوت
جندل


احلى شي ان انا وياج دائما على خط متوازي .. تحسين فيني واحس فيج نمر بنفس المراحل ونفكر ذات الأفكار إللي لج عليها في كل الأمور المختصة بالورعان.

البندريل كاهو اول شي حطيته بالجنطه حتى قبل الجواز ..

وان شاء الله تصلكم الأخبار قريبا
‏قال سبمبوت
توتور

يا حبيبة قلبي شهرزاد موجودة بس تغط شوية ولابد تطلع من جديد ..
‏قال سبمبوت
الزين ..

حاطتج نصب عيوني .. خبراتج ما تروح عن بالي .. انت القدوة الله يسلمج.

لابد من التطمينات .. نطري بي بي ام وإلا رسالة انتحار وحدة من الإثنين.
‏قال Ra-1
ههه بالسلامة إن شاءالله :)
‏قال ARTFUL
بعد الواحد رايح يغير جو ويبتعد عن الالتزامات شماله الواحد يعور راسه ويكتب ويرد على التعليقات!!

صج ودي أقرا ،، وفيني تحلطم من كثر ما نطرت ،، بس ما الومج انا لو بسافر اغير جو ما ودي أدق على الديرة!!

p;
تروحين وتردين بالسلامة ان شاء الله ^^
‏قال غير معرف…
الله يحفظكم و يعينك و ييسر لك أمورك يااارب يااكريم

المشاركات الشائعة من هذه المدونة

امرأة تحب النساء !

" غدّونة" تذهب للمدرسة !

أنا عندي أرنبه ..